-පෝලිම-

-පෝලිම-

බැංකුවේ කවුන්ටරේ ඉස්සරහ පිට දිග පෝලිම.සඳුද දිනයක් නිසා සෑහෙන්න සෙනග. සල්ලි දාන මැශින් එක ඉස්සරහා ඊට වඩා පෝලිම. ආරක්ෂක නිලධාරින් ආරක්ෂාව බල්ලට දාල එතන මිනිසුන්ට මැසිමෙන් සල්ලි දාන්න උදව් කරනවා.

" මුන්ට තව දෙන්නෙක් කවුන්ටර් වලට දාන්න බෑනේ අම්මපා"

මට ඉස්සරහා සුදු යකඩ කිලෝ දෙකක් විතර පොරවන් ඉන්න මනුස්සයා මගෙ දිහාට හැරිලා නියවනවා.

"ඒක ඇත්ත, රස්තියාදුව විතරයි"

මිනිහට මම අකමැති උනත් හිටගෙන පෝලිමේ ඉන්න එක ගැන අප්‍රසාදය මං පල කරනවා. මිනිහා දිරිමත් වෙනවා.

"රජයේ බැංකු ඔහොමමයි.... "

මිනිහා ආයෙම කියනවා.ඇහුණේ නැති ගානට මම ෆෝන් එක අතට අරන් ඔබන්න පටන් ගන්නවා. ඒ අතරේ අතදරුවෙක් වඩා ගත්ත අම්මා කෙනෙක් පෝලිමේ පිටිපස්සෙ හිටගෙන ඉන්නවා දැක්ක කැශියර් නෝනා අත වනලා එයාට කතා කරනවා. ලමයත් එක්ක එයා කවුන්ටරේ ලඟට යද්දි එයාගේ යාලුවත් බැංකු පොත උස්සන් අනුන්ගේ පානෙන් එලිය බලනවා...

මිනිස්සු සේරම මූණ හපුටු කරන් තමන්ගේ නොකැමැත්ත පෙන්නනවා. ඒ අස්සෙ කවුන්ටරේ ඉන්න තරුණයගේ දුරකථනයට ඇමතුමක් එනවා

" 2016 සුසුකි... වැගන් ආර්. ෆුල් ඔප්ශන්. කිලෝමීටර් තිස් දාහයි. පර්ල් වයිට්... නෑ නෑ පර්ල් වයිට්. ඔව් ඔව් ...ටූ පොයින්ට් එයිට් මිලියන්. එනවා,නං කියන්න අද වාහනේ ආවේ මම බැංකුව ලඟදී බලන්න පුලුවන්"

ඇමතුම විසන්ධි කරලා කොලුවා චෙක් එකක් මුදල් කරනවා...

"මෙතන අත්සන් කරලා අයිඩී නම්බර් එකයි , ෆොන් නම්බර් එකයි ඩේට් එකයි ලියන්න.... මෙතනත් අත්සන් කරන්න"

චෙක් එක දුන්න මනුස්සයා බයාදු විදියට

"සර් පෑනක් පොඩ්ඩක් දෙනවද?"

තරුණ නිලධාරියා පෑන දික් කරනවා.

අපි බැංකුව විශ්වාස කරලා කෝටි ගණන් සබ්බ සකලමනාව සේසතම දැන්මට බැංකුවට අපිව සත පහකට විශ්වාස නෑ...ඒ නිසා එයාල රුපියල් දහයේ පෑනටත් නූලක් දාලා ගැටගහලා තියනවා.

මං බැංකුවේ බිත්තියක එල්ලලා තියන රූපවාහිනී තිරය දිහා බලන් ඉන්නවා.මුවෝ රංචුවක් පස්සෙන් පන්නන කොටි දෙන්නෙක් අහිංසක මුවෙක් කොටු කරන් ඌව මරන්න එලවන හැටි ටීවී එකේ පෙන්නනවා. බඩ මහත් මුදලාලි කෙනෙක් පන්දාහෙ කොල මිටි විස්සක් විතර අරන් බැංකුව ඇතුලට ඇවිල්ලා හිටගෙන බැංකුව සිසාරා බැල්මක් හෙලනවා. මං ආයෙමත් රූපවාහිනිය දිහා බලනවා.

මුවා පණ අදිනගමන් තමන්ගේ හුස්ම පොද රැකගන්න සටන් කරනවා. ඒ එක්කම මැනේජර් මහත්තයා දුවගෙන ඇවිල්ලා මුදලාලි ව තමන්ගේ වීදුරු කාමරේට එක්කන් යනවා. දෙන්නගේ ඔලුගෙඩි දෙක විතරක් පේනවා. ඒ එක්කම බැංකුවේ අනික් කෙලවරේ ඉන්න දෙවනි මහත්තයගේ මේසෙ උස දුරකථනය බෙරිහන් දෙන්න ගන්නවා.

"හරි සර්"

කියලා ඒ මහත්තයා රිසීවරේ තියන ගමන් පියන්ට අඬගහලා සල්ලි දාන කොලයක් මේසෙ යටින් ඇඳලා දීලා මොකද්ද කියනවා. පියන් මැනේජර් මහත්තයගේ කාමරේට ගිහින් විනාඩි කීපෙකින් සල්ලි මහ ගොඩක් අරන් කෙලින්ම කවුන්ටරේ ලඟට යනවා.

කවුන්ටරේ ඉන්න නෝනාට කේන්ති ගිහින් වගේ පෝලිමේ ඉන්න මිනිස්සු පෙන්නලා මොනවද කුටු කුටු ගානවා.

"මං දන්නෙ නෑ බොස් කිව්වෙ" කියාගෙන පියන් එතනට වෙලා හිටගෙන ඉන්නවා.

ක්‍රාස් ක්‍රාස් කෲස් ගාලා සල්ලි ගණන් කරන මැසිම එක දිගට වැඩ කරනව. ටීවී තිරයේ දැන් යන්නෙ මුවාගේ මස් කන කොටියන්ගේ සමීප දර්ශන පෙලක්. උන් බොහොම සංතෝසෙන් ලේ පෙරාගෙන මස් කනවා. පෝලිමේ ඉන්න මිනිස්සු සේරම ඒකට අවධානය නිසා කැශියර් නෝනත් මහ සල්ලි මිටි ටික විනාඩියට ගණන් කරලා ඉවර වෙලා ලාච්චුවට දාල කහපාට රිසිට් එක පියන්ට දෙනවා. මිනිහා ඒක,අරන් මැනේජර් ගේ කාමරේට දුවනවා.

මස් කාපු කොටි දෙන්නා ගහක් උඩට නැඟලා නිදාගන්න ලේස්ති වෙනවා. මැනේජර් ගේ කාමරෙන් එලියට ආපු බඩ තඩියා බැංකුවේ අනිත් අයට අත වනාගෙන පෝලිමේ සෙනඟ දැකලා පුදුමයෙන් වගේ බලලා

"අද හරියට සෙනඟ නේද ?" කියලා සිකුරිටිට කියාගෙන එලියට බැහලා වාහනේට නඟිනවා.

" අපිටත් සල්ලි මිටි තිබ්බා නං අපිත් පෝලිම් වල තපින්නෙ නෑ "

අර මනුස්සයා මං දිහාවට හැරිලා ආයෙමත් කියවනවා.

දුර්වලයා ,බලවන්තයාගේ සදාතනික ආහාරය වේ කියන කියමන මං දැක්කෙ කොතනදීද කියලා කල්පනා කරන ගමන් මං පෝලිමට වෙලා ඉන්නවා.

කුෂාන් ප්‍රේමසිරි
02/06/2019