Gonbaduwatta , ගොංබදුවත්ත

පතලේ

අපේ මුලු ගමම පතල් කරුමාන්තෙත් එක්ක පුදුම විදියට බැඳිලා තිබුනා. ඉස්කෝලෙන් කට්ටි පැනපු තාත්තා පතල් කම්කරුවෙක් විදියට ජීවිතේ පටන් අරන් තියෙන්නෙ වයස අවුරුදු දාහතරෙදි. ලොකු බාප්පා නොම්බර එකේ පතල් බාස් කෙනෙක් , වලක් බහින විදිය දෝනා කපන්න ඕන විදිය පස් කඩන් වැටෙනවාට කරන්න ඕන පිලියම් වගේ එකී මේකී නොකී සියලුම දේ දන්න බාප්පා ගේ ප්‍රායොගික දැනුම ඉස්සරහා ඔය මයිනින් ඉන්ජිනේරු උදවිය පොඩි ලමයි.

ඉතින් , පොඩි කාලෙ සිටන් මම ආවේ සොයන් වගේ අපි දැක්කෙ පතල් කරුමාන්තෙ.කොටින්ම අපි වැස්සකට පස්සෙ මිදුලේ ඇවිදින්නේ බිම බලන්. ඒ උනාට හම්බුන කෙන් ගෙඩියක් නැහැ.

ඒ උනාට, උදේ පාන්කඩ සරම ඇඳන් මැණික් ගරන්න ගිය මනුස්සයා පහුවදාට කිරි ටොය්යා වගේ බොක්ස් මොඩල් ලාන්සර් එකේ, පලාත්සභා පජෙරෝ එකෙ උජාරුවට යන එන විදියත් , නිසි කලමණාකරනයකින් තොරව මුදල් පාවිච්චිය නිසා හය මාසේකින් පස්සෙ අපහු පරන සරමම ඇඳන් පතල් යනවත් අපි දැක්කා.

සමහරු බීලාම නාස්ති උනා. සමහරු අනාචාරයේ ගිහින් අපා ගත උනා. සමහර මැණික් මුදලාලිලා එක රැයට වියදම් කරපු මුදල ඉලක්කම් හයකට එහා ගිය ගානක්.

දෙවනි එලිසබෙත් රැජිනට සන්තෝසෙට නිල් මැණිකක් පරිත්‍යාග කරපු නිමල් පතිරණ මහත්මයා ඒ වගේ ලස්සෙට කොඩි දාපු කෙනෙක්. කොටින්ම චාල්ස් කුමාරය ඩයනා කුමරිට පලන්දපු මගුල් මුදුවෙ මැණික අපේ මේ පුන්චි රටෙන්. ඒ නිසාම වෙන්න ඇති විලියොන් කුමරා කේට් මිඩිල්ටන් විවාහ මන්ගල්ලෙට දහසක් රාජ්‍ය නයුවන් අතරෙ නිමල් පතිරණ මහත්මයා වාඩි වෙලා හිටියේ. නමුත් ඉන් වසරකට දෙකකට පස්සෙ අතේ සත පහක් නැතුව බස් හෝල්ට් එකක සිගන්නෙක් විදියට හිටිය නිමල් පතිරණ මහත්මයා ගේ ශෝකාන්තය මම දුටුවේ අන්තර්ජාලයෙන්.

සමහරු කිව්වා කරුමය කියලා තවත් සමහරු කිවේ අසාධාරණ හම්බු කිරීම කියලා. නමුත් අපට එහි විනිශ්චයකාරවරුන් වීමට සදාචාරාත්මක අයිතියක් නැහැ.

ඔන්න ඔය වගේ බොහොම රසවත් විශයක් තමා ඔය මැණික් , මගේ අත්දැකීම පටන් ගන්නෙ මෙන්න මෙහෙම.

"කුශාන් මල්ලි කොහෙද ඉන්නෙ?"

"ගෙදර අයියේ, "

"එල, මල්ලි කවද්ද එන්නෙ අපහු?"

"අනිද්දා එනව , ඇයි අයියේ ?"

" මල්ලි මේකයි , මට අපලෙකට මුද්දක් දාන්න යන්නෙ,පුලුවන්ද කාක නිල් පොඩි ගල් කෑල්ලක් හොයලා දෙන්න.? ගාන අව්ලක් නැහැ ,නියම කාක නිලක් වෙන්නම ඕන"

"හා මන් බලල හවස් වෙලා කියන්නම් අයියේ"

ඔන්න ඔය පනිවුඩෙන් පස්සෙ සුලු පරිමානයෙන් මැණික් වෙලදාම කරන ගුරුවරයෙක් මාර්ගයෙන් මම ඩයමන්ඩ් කට් එකට කපලා ඔප දාපු කාක නිලක් අරන් අදාල පුද්ගලයට ගොහින් දෙනවා.

"තමුසේ දෙයියෙක් නෙමෙ දේවාලයක් කියලා " උඩ පැනපු මිනිහා ගල පෙන්නල ගෙන්නම් කියල මගෙ අතින් ඉල්ල ගන්නවා. අවිස්වාස කරන්නෙ මොකටෙයි කියලා මාත් දීලා දානවා.

" මල්ලි ගල සුපිරි,ඒත් සයිස් එක මදි බන් කියලා "එදා හවස මනුස්සය මට ගල ආපහු දෙනවා.ඊලඟ සිකුරාදා මන් ගමෙ ගිහින් දෙන්නම් කාසි වලට ගල දුන්න සර් ට ගල ගිහින් දෙන්නෙ සයිස් එක මදි මිසක් ගලේ අව්ලක් නෙමෙයි කියාගෙන.

පෙට්ටියෙන් එලියට ගල අරන් හොදට බලපු එතුමා කිවේ

"ඕයි මේක ප්ලස්ටික් ගලක්නෙ ,තමුසෙගෙ යාලුවා කනෙන් රින්ගලා තමුසෙගෙ කියලා"

මන් එවෙලෙම කෝල් එකක් අරන් ඇහුවට මිනිහා කිවේ එහෙම දෙයක් වෙන්න බැරිය කියලා. කට වහන් පාඩුව පිලිගත්ත මම , ගෙදරට හොරෙන් ඒ කාලෙ මන් ලග තිබුන රෝඩ් මාස්ටර් යතුරුපදියෙ පොත උකස් තියලා ගනුදෙනු බේරුවා.

අට මාසෙකට පස්සෙ ආනමඩුවෙ තිබ්බ මිතුරෙකුගෙ සොයුරියකගෙ විවාහ මංගල උත්සවෙට ඒ අයියා ආවෙ කාක නිලක් දාපු මුද්දක් අතේ දාගෙන.

කුෂාන් 09/12/2018