ෆෘට් ජූස්
මං ඉතිං ඔය කන බොන එව්වා කිරලා මැනලා කන මනුස්සයෙක් නෙමෙයි.බොහොම අමාරුවෙන් හාල් සේරු එක හමාරක බත් කන, පාන් රාත්තල දෙකට කපාගෙන හරි අමාරුවෙන් කන මනුස්සයා. කොටින්ම කෑම ගැන මං එච්චර හිතන්නෙ නෑ . යන්තං මසක් මාලුවක් එක්ක මාලුව ජාති හතරක් බිත්තරයක් තිබ්බම අනේ හොඳටම ඇති මට.
ඔන්න ඔයාකාරයට කටයුතු සිද්ද වේගෙන යද්දි මට හිතුනා පලතුරු යුෂ බොන්න. ඒ කියන්නෙ මේ ෆෘට් ජූස්. සරීරෙට හොඳයි නේ...ඒකයි
හැබයි ලංකාවේ නං ජූස්බාර් වල එක කොමඩු ගෙඩියයි ගස්ලබු ගෙඩියයි, දොඩං ගෙඩි පහයි තිබ්බා නං ගමක් ආවත් හදහදා දෙනවා. හරියට රත්ති වගේ.පාර අයිනේ විකුණන ඒවා ඇත්තටම හොඳයි මොකද ඇහැට පේන්න දොඩං හෙවත් සිදරං ගෙඩි දෙකක්ම දාලා පොඩි නාරං ගැටේකුත් දාන නිසා. ගාණත් සාධාරණයි.
ඔය නිසා මං ෆෘට් ජූස් හදන බ්ලෙන්ඩරයක් ගෙනාවා. උස ලොකු කෝප්පෙ තියන හුරුබුහුටි මැසිම. එමිං ගමන් අලිගැට පේර මල්ලක්, අයිස්ක්‍රීම් ලීටරයක් , කිතුල් පැණි බාගයක් එහෙම ගෙනල්ල බ්ලෙන්ඩ්රේට සේරම දාලා අයිස්ක්‍රීම් පැණිත් දාලා ඒකට වැඳලා නමෝ විත්තියෙන් සුවිච් එක දැම්මා.
මට එච්චරයි මතක.
සතුට වැඩිකමට මං සේරම දාල බ්ලෙන්ඩ්ර් එක ඔන් කරලා තිබ්බෙ උඩ පියන වහන්නෙ නැතුව.
කුස්සියේ සීලිමේ, බිත්තිවල ,සහ අනෙකුත් සෑම තැනම අලිගැට පේර අයිස්ක්‍රීම් මික්ස්චර් එකක් ස්ප්‍රේ කලා වගේ. හරිම කලාත්මකයි , ඒකාත්මිකයි.
හරියට කක්කුසි වලකට ඩයිනමයිට් දාල පිපිරෙව්වා වගේ.
සේරම බඩු මුට්ටු එලියට ඇදලා හෝදලා වේලලා වැඩේ පිලිවෙලයිස් කරන්න මට වරුවක් ගියා. ඒත් ඒ වහන්තරාව හරියට සුද්ද වෙන්නෙ නෑ , වෙලා යන්න යන්න නරක් වෙන නිසා පිළුණු ගඳ.
අන්තිමේ දවසක් ගෙදර නැවතිලා , පරණ තීන්ත බකට් එකක තිබ්බ තීන්ත ගාලා තමා ලෝකපාවාදයෙන් බේරුනේ.
තව කෙනෙක්ට ඕකම වෙලා තිබ්බා පොල් ටිකක් බ්ලෙන්ඩර් කරද්දි .මිනිහා ගේ දාලා ගියා
කුෂාන් ප්‍රේමසිරි
29/07/2019
29/07/2019
No comments:
Post a Comment